Boasttulogut raporteremis Oahpahusdirektoráhtii (Utdanningsdirektoratet) addá Sámi joatkkaskuvlii Kárášjohkii heajut bohtosiid go dat mii lea duohta.

Go Odir almmuhii skuvlaboađusindikáhtoriid mannan vahkus, de dat seammás šattai stuorra mediaáššin. Skuvllaide lea hui dehálaš oažžut buriid bohtosiid dákkár iskkademiin. Mii, Sámi joatkkaskuvllas, duođai hirpmahuvaimet go mis ledje nu heajos bohtosat. Dát bohtosat dattege eai doallan deaivása go buohtastahtiimet iežamet statistihkain.

Suoidnemánu 1.beaivi lea dat magihkalaš skuvlaboađusindikáhtor loguid raporterenbeaivi Oahpahusdirektoráhttii. Sámi joatkkaskuvlla Kárášjoga bohtosat leat boasttuloguid vuođul raporterejuvvon ja dan dihte oažžu min skuvla heajos bohtosiid oahppospesialiseren suorggis Oahpahusdirektoráhta visogovas. Dát fuomášuhttojuvvui Odir:i buori áiggis, muhto sii dattege válljejedje geavahit suoidnemánu 1.beaivvi lohkomateriálaid.

Logut mat leat indikáhtoriid vuođđun čájehit ahte 4 oahppi 20 oahppis ovtta oahppospesialiseren luohkás cevze, riekta lei ahte 19 oahppi 20 oahppis cevze. Dát logut leat váikkuhan sakka min bohtosii. Obbalohkái cevze 62 oahppi 74 oahppis oahppospesialiseremis, 40 oahppi 40 oahppis fidnofágas ja 8 oasseáiggeoahppi 9 oasseáiggeoahppis. Jus dát logut livčče lean vuođđun iskkadeami publiseremii, de livčče Sámi joatkkaskuvla boađus lean mealgat buoret go dan mii dál čájehuvvo.

Ná unna skuvllažii go mis lea, de čuhcet dákkár logut sakka statistihkkii. Min iežamet visogovas oaidnit mii baicce ahte mis leat unnán oahppit geat heitet ja leat ollugat geat čađahit skuvlla.

Kárášjohka 12.12.18

  • Oahppolihttu
  • Skolenes landsforund
  • Norsk tjenestemannslag
  • Skuvlla jođiheaddjit